Dako nga bentaha para kay Bacolod City Councilor Em Ang ang mga nangin training sini bilang isa ka registered nurse, sa iya pagpungko bilang chairperson sang Committee on Health sa Sangguniang Panlungsod.
Sa interview sang Bombo Radyo Bacolod, indi na bag-o para sa konsehal ang nasambitan nga komitiba bangod ini ang nakapyotan naman sini sadto.
Suno diri, pagatutukan niya ang mga consistent health concerns lakip na ang mga lifestyle diseases kag ang madasig nga pagsaka sang kaso sang dengue, leptospiroses kag human immunodeficiency virus (HIV).
Kasubong man ang mga masami nagarequest sang medical assistance kaangay sang non-communicable diseases, partikular na sa diabetes, kidney disease kag high blood.
Apang panindugan ni Ang nga indi pwede nga ang ciudad ang maresponder na lamang kun may outbreak na sa balatian, sa baylo dapat nga maghimo man sang preventive measures.
Sa idalom sang Gasataya Administration, plano sini nga ipadayun ang local health system, kag ini ang iya suguran sa pagconvene sang local health board.
Pasalig naman sini nga padayun ang City Health Office sa pagpatuman sang mga programa nga gikan mismo sa Department of Health kag National Government kaangay sang dengue kag leptospirosis programs.
Bilang preventive measures, plano ni Ang nga gamiton ang mga eskwelahan sa information dissemination ukon pagpatigayon sang education campaign.
