Plano sang chairperson sa Committee on Health sang Bacolod City Council nga idumili ang pagbaligya sang mga sweetened beverages kaangay sang soft drinks kag juice sa gwa sang mga eskwelahan kasubong man sa mga programa sang ciudad.
Sa interview sang Bombo Radyo Bacolod kay Councilor Em Ang, magadiskusyon pa ini kay Mayor Greg Gasataya nga nagaserbe nga chairman sang Local Health Board angod sa mga health projects nga ipatuman sa ciudad.
Suno diri, may ordinansa na para sa pagregulate sang ambulant vendors sa gwa sang mga eskwelahan agud malikawan ang mga balatian nga makuha sa mga pagkaon nga indi husto ang pagpreparar.
Siya man ang author sang ordinansa gani plano sini nga ini ang liwat nga mapatuman.
Magapropose man ini sang ordinansa nga magadumili sa pagbaligya sang mga sweetened beverages kaangay sang soft drinks kag juices sa gwa sang eskwelahan kasubong man sa mga events sang local government.
Ini bangod sa madasig nga pagsaka sang kaso sang diabetes.
Nagapati ini nga kulang ang pag-edukar lamang bangod madamo gihapon ang indi magpamati gani mas maayo nga idumili nagid lamang ang pagbaligya agud maregulate ang consumption sang mga kabataan
Pasalig ni Ang nga siya ang aktibo nga magabulig sa Gasataya Administration sa pagpabakod sang local health system, pagpatuman sang universal healthcare, pagsabat sa concerns sang mga pumuluyo kag implementasyon sang Bacolod City Comprehensive Health Program (BACCHP).
Iga-expand pa nila ang coverage sang BACCHP, samtang suguran naman ni Mayor Greg Gasataya ang pagpatukod sang mga mini hospitals.
