Gindeklarar nga dead on arrival ang isa ka graduating student matapos ang aksidente nga nagluntad sa Negros South Road, Barangay Mabini, Pulupandan, Negros Occidental kaina alas 3:38 ang takna sang kaagahon.
Ginkilala ang biktima nga si Christian Lord Colindres, 23 anyos, estudyante, kag residente sang Barangay Zone 7, Pulupandan samtang ang driver sang Hyundai accent 2016 amo si Glenn Nermal, 34 anyos, driver kag residente sang Barangay Miranda, Hinigaran, Negros Occidental
Sa interview sang Bombo Radyo Bacolod kay Police Major Edfel Balibadlan, hepe sang Pulupandan Municipal Police Station, may tawag sa ila hotline agud nga magpahibalo nga may nagluntad nga aksidente.
Suno kay Balibadlan, gilayon man nga nagresponde ang traffic investigator kun sa diin nagwa sa inisyal nga imbestigasyon si Colindres ang nagamaneho sang motorsiklo kaupod ang mga abyan sini padulong sa Valladolid.
Interview clip with Police Major Edfel Balibadlan, Chief of Police sang Pulupandan Municipal Police Station
Suno sa hepe, ang duha ka abyan ni Colindres ang nag-overtake sa salakyan nga ginamaneho ni Nermal apang ang biktima ang nabilin kag nakabunggo sa likod sang salakyan.
Nakaangkon sang samad sa nagkalain-lain nga bahin sang lawas kun sa diin gindala pa sang responder sang banwa sang Pulupandan sa Valladolid District Hospital apang gindeklarar nga dead on arrival.
Suno sa nakakita si Colindres kaupod ang duha sini kaabyan nga nagamaneho sang ila tagsa-tagsa nga motorsiklo ang madasig ang pagpadalagan kag ginpahayag man nga nagapanimaho ini sang makahulubog nga ilimnon.
Si Colindres ang graduating student sa kurso nga Aeronautics sa Manila kag nagbakasyon lamang sa banwa sang Pulupandan kag ang mga ginikanan sini ang lunsay Overseas Filipino Worker.
Sa karun temporaryo naka-detain sa Pulupandan Municipal Police Station.
Suno sa hepe, wala pa sang impormasyon kun mapasaka sang kaso ang pamilya sang biktima apang kun indi, i-release ang driver sang salakyan matapos ang 18 oras nga reglementary period.
