Ginsuspender sang duha ka adlaw ang klase sa mga Elementary Schools kag tanan nga Day Care Centers sa banwa sang EB Magalona bangod sa nagasaka nga kaso sang Hand, Foot, and Mouth Disease (HFMD).
Paagi sa Tumandok EB Magalona facebook account, gin-anunsyar ang pag-issue ni EB Magalona Mayor Matthew Louis Malacon sang Executive Order No. 41, Series of 2025 nga nagadeklarar nga wala sang klase halin subong nga adlaw Hulyo 10 tubtob bwas, Hulyo 11.
Kalakip diri ang Nanca Elementary School, E.B. Magalona Elementary School, kasubong man ang tanan nga Child Development Centers sa banwa.
Sa interview sang Bombo Radyo Bacolod kay EB Magalona Vice Mayor Marvin Malacon, gikan pa lamang sa mga eskwelahan ang nabatun nila nga records sang HFMD cases kag wala pa sang gikan sa komunidad.
Suno diri, duha ka executive order ang ginpagwa ni Mayor Matthew, ang una ang nahanungod sa protocols nga himuon kun may kaso kag ang ikaduha amo ang suspension sang klase.
Ginsuspender ang klase agud mahatagan sang ligwa ang pagpatigayon sang nagakaigo nga public health interventions kaangay sang disinfection nga abiso sang Municipal Doctor.
Sa karun, ginaback tracing man nila ang mga pamilya, abyan ukon classmates nga mahino na-expose sa pasyente.
Karun nga suspendido ang face-to-face classess, sarang naman makapatigayon sang alternative delivery mode.
Samtang sa pagbalik sang klase sa Lunes, ginmando sang alkalde ang pagpanghatag sang vitamins, facemask kag alcohol sa mga eskwelahan.
Nagcontact naman ang alkalde sa Department of Education, nga temporaryo nga dumilian ang contact sports.
Magapalapta man ang banwa sang mga tarpaulins nga nagahatag pahanumdom kun paano malikawan ang HFMD kag kun ano ang dapat himuon kun malatnan.
Panawagan man sini sa mga pumuluyo nga gilayon magkadto sa Municipal Health Office ukon makig-angot sa mga Barangay Health Workers kun may-ara sang sintomas sang Hand, Foot, and Mouth Disease.
