Napatay kagab-i ang gunman nga nagpaniro sang tatlo ka persona sa Sitio Beranio, Barangay Lantad, Silay City sang Huwebes.
Madumduman nga hinali lamang gintiro sang motor-riding suspect nga si Mark Pelayo ang tatlo ka persona sa Silay City.
Una na nga ginpahayag nga ang gunman ang gina alegar nagahallucinate kag nagahambal nga siya ang ginalagas sang 20 ka tawo.
Nag-angkas ini sa iya abyan nga si SK Kagawad Ar Ar sang Brgy Canlusong, EB Magalona, kag sila ang naglibot-libot tubtob nga nagpangluthang sang ila malabayan.
Nahibaluan nga una na nga ginsurrender sang pamilya sa Silay City Police Station ang SK Kagawad.
Sa press conference ni Police Lt Col Mark Anthony Darroca, hepe sang Silay City Police Station, ginpahayag ni Ar Ar nga wala ini nakahibalo nga magapaniro si Mark, gani sang siya ang nakabati sang lupok, gilayon sini ginpuga ang gasolinador agud makapalagyo.
Gin-ako man sini nga siya ang nagagamit sang illegal nga droga, samtang siya ang ginsurrender gid sang ginikanan bangod lainlain naman ang iya ginahambal, kaangay sa pagpamahog nga sila ang ‘ihawon.’
Gikan diri, natumod nga si Mark ang residente sa Cadiz City gani nagkoordinar ang Silay City Police Station, kag ginpahayag sang Cadiz City Police Station nga ang gunman ang subject man sa ila drug buybust operation
Gilayon nga naghimos sanday Darroca sa pagpadulong sa Cadiz, apang pag-abot nila kapin alas-9:00 sang gab-i, napatay na si Mark.
Wala naman naghatag sang detalye si Darroca kun ano ang sahi sang operasyon sang Cadiz PNP, apang ini ang ginapahayag nga nagbato sa kapulisan.
Nakumpirmar nila nga si Mark ang suspect sa shooting sa Silay City, bangod parehas ang sling bag, bayo kag kalo nga nakita sa balay sini, sa suksok sang gunman sang ginhimo ang pagpaniro.
Kun makakuha na sang medical certificate sang tatlo ka biktima sa shooting, hingagawon nga mapasaka ang kaso nga 3 counts sang frustrated homicide, apang nakadepende na sa fiscal kun ini ang batunon ukon ikonsiderar nga accessory lamang sa krimen si Ar Ar.
