Ginpangabay sang grupo sang mga negosyante sa Bacolod City nga kun magpatuman sang wage hike, amat-amat lamang bangod madamo ang indi makasarang sang P200 nga saka sa sweldo.
Madumduman nga una na nga ginpasar sang House of Representative ang P200 legislated wage increase samtang P100 naman ang ginpasar sang Senado sa 19th Congress.
Apang ini ang wala nakalab-ot sa Office of the President antes magtakop ang 19th Congress, gani sa karun, ginrefile na lamang sa 20th Congress.
Sa pahayag ni Metro Bacolod Chamber of Commerce and Industry President Atty Juliana Carbon, madamo sang mga business owners ang nagawangal sa P200 nga ginaduso nga saka sa sweldo.
(video for graphics purpose only)
Aminado ini nga dako nga kalipayan sa mga empleyado kun mapasar ang P200 nga wage increase, kag ini ang iya nahangpan bangod siya ang nag-umpisa man bilang empleyado.
Wala sila nagapamatok sa pagpasaka sang sweldo apang gina-ayo nila nga amat-amat lamang.
Paathag sini nga mga dako nga negosyante lamang ang makasarang sang gulpyada nga pagsaka sa sweldo kag ini ang indi pa masarangan sang mga Micro, Small and Medium Enterprises (MSME).
Pahanumdom sini nga ang mga negosyo nga may manubo sa napulo ka empleyado ang may excemption sa paghatag sang minimum wage bangod sa kabudlayan sa pagpasweldo, gani indi aplikable sa mga ini kun hinali pasakaan sang P200 ang igabayad sa empleyado.
Suno diri, masarangan pa sang mga negosyante ang P100 kag sa masunod na lamang ipatuman ang dugang nga P100 ilabi na nga nagabangon pa lamang ang kalabanan nga negosyo.
Aminado man si Carbon nga bentaha man sa negosyante kun magdako ang sweldo bangod magadako man ang purchasing power sang mga mamumugon, kag magadasig ang pagcirculate sang kwarta.
