Napabilin pa sang Tropical Storm Crising ang kabaskugon sini samtang nagapalayo sa Extreme Northern Luzon.
Sa latest tropical cyclone bulletin alas-5:00 subong nga aga, ang Bagyo ang ulihi nga nasiplatan sa 125 km West Northwest sang Calayan, Cagayan.
Dala sini ang kabaskugon sang hangin nga nagadangat sa 85 km/h kag pagmadlos nga tubtob 115 km/h.
Ang Bagyo ang nagahulag sa West Northwestward nga dereksyon padulong sa Southern China sa kadasigon nga 15 km/h, kag magapadayun sa banas tubtob nga makagwa sa Philippine Area of Responsibility subong nga aga ukon karun sa hapon.
Ginalantaw nga magabaskog pa ang Bagyo kag magadangat sa Severe Tropical Storm category subong nga adlaw.
Sa karun, yara gihapon sa Tropical Cyclone Wind Signal No 2 ang Batanes, naaminhan nga bahin sang Cagayan kalakip ang Babuyan Islands, Ilocos Norte, northern kag central portions sang Apayao kag naaminhan nga bahin sang Abra.
Signal No.1 naman sa nabilin nga bahin sang Cagayan, naaminhan nga bahin sang Isabela, nabilin nga bahin sang Apayao, nabilin nga bahin sang Abra, Kalinga, Mountain Province, Ifugao, naaminhan nga bahin sang Benguet, Ilocos Sur, kag naaminhan nga bahin sang La Union.
Lauman subong nga adlaw ang mabulubagyuhon nga panahon sa Batanes, Cagayan, Apayao, kag Ilocos Norte tuga sang Tropical Storm Crising.
Bangod sa Bagyo, lauman man ang mabaskog nga mga pag-ulan nga may kaupod nga mabaskog nga yuhop sang hangin sa Isabela, Ilocos Sur, La Union, kag nabilin nga bahin sang Cordillera Administrative Region.
Madamol nga ulan man ang mabatyagan sa Metro Manila, Pangasinan, Zambales, Bataan, Cavite, Batangas, Occidental Mindoro, Palawan, Western Visayas, kag sa atun sa Negros Island Region bangod sa Southwest Monsoon ukon Hangin Habagat.
May dugay-dugay man nga pag-ulan sa Central Visayas, Zamboanga Peninsula, nabilin nga bahin sang Cagayan Valley, nabilin nga bahin sang Central Luzon, nabilin nga bahin sang CALABARZON, kag nabilin nga bahin sang MIMAROPA bangod gihapon sa Habagat.
Samtang apektado man sang Habagat ang nabilin pa nga bahin sang pungsod, nga makaeskperyensya sang magal-umon nga kalangitan nga magatuga sang mga pag-ulan kag thunderstorms.
