Nagapanawagan ang Binalbagan Municipal Police Station sa mga pumuluyo sang banwa sang Binalbagan kun may yara man sang nakakita sa anay seaman nga naanod sa suba sa ciudad sang Himamaylan.
Ginpahayag sang pamilya nga ang biktima ang naanod matapos nga gintuyo sini nga kuhaon ang kahoy nga naanod sa suba apang gin-anod ini sang tubig kag nagsulod sa tamburong sang overflow.
Mabaskog naman ang pagdaludo sang tubig gani wala na sini masarangan nga maglangoy kag ini ang gin-anod na.
Ang suba ang nahamtang sa boundary sang Himamaylan City kag banwa sang Binalbagan.
Sa interview sang Bombo Radyo Bacolod kay Police Captain Joelan Vinson, hepe sang Binalbagan Municipal Police Station, padayon pa ang pagpangita sa biktima kun sa diin ulihi ini nga nakit-an nga nakasuksok sang puti nga tshirt.
Nagapanawagan ini sa mga pumuluyo kun may yara man sang makakita sa biktima nga makig-angot lamang sa ila
Nagpanawagan man ang Chief of Police sang Himamaylan City Police Station sa kun sin-o man makakita sa biktima.
Sa interview sang Bombo Radyo Bacolod kay Police Lt. Col. Anthony Grande, sang naanod ang bitkima nakit-an pa ini 300 metros nga nakabutwa apang kasunod sini wala na siya liwat nga nakit-an.
Suno diri, bangod ang current sang tubig ang padulong sa banwa sang Binalbagan, iya ginapanawagan sa kun sin-o man ang makakita sa iya nga makig-angot lamang sa otoridad.
