Ginserbe sang Bacolod City Legal Office ang abatement and removal order asinan nga ginatudlo dako ang kontribusyon kun ngaa madugay nga nagsubside ang tubig baha sa Prk Sta. Clara, Barangay Banago, Bacolod City nga nag-umpisa sang Hulyo 12.
Sa interview sang Bombo Radyo Bacolod kay Bacolod City Legal Officer Atty Carol Joseph Chiu, ginhatagan nila sang 72 oras ang Artemis Salt Corporation agud boluntaryo nga magcomply kag idemolish ang drainage outfall.
Nahibaluan nga ang drainage outfall sang asinan ang ginalantaw rasun kun ngaa madugay nga magsubside ang tubig sa nakaligad nga pagbaha.
Madumduman nga nangin lapnagon ang pagbaha sang Hulyo 12 sang gab-i, apang gilayon nga nagsubside ang baha sa Brgy Bata kag Brgy Mandalagan kag iban pa nga naapektuhan nga lugar, samtang malawig naman nga nagtinir ang tubig sa Brgy Banago.
Matapos macomply, ang mga ini naman mismo ang magareport sa Bacolod City Legal Office sa Lunes.
Samtang, nagpasalig man ang consultant sang Artemis Salt Corporation nga sila ang magasunod sa mando.
Sa interview sang Bombo Radyo Bacolod kay Engr. Marcelo Cobrador, aminado sila nga kalakip ang ila gintukod nga drainage outfall sa rasun sa madugay nga pagsubside sang tubig-baha.
Suno diri, sila ang nagdugang pa sang 1.2 meters nga backfill para sa negosyo.
Ang drainage outfall, ang gintukod naman agud nga indi magsaka sa ila asinan ang tubig gikan sa dagat partikular na kun maghightide.
Kun sa diin kun magsaka gid man ang tubig, gamay lamang ang makasulod pinaagi sa ginprovide nga gamay nga outlet nga konektado sa drainage.
Suno kay Cobrador, normal lamang ang reaksyon sang mga pumuluyo, apang ang mas nakahibalo sa technical nga aspeto amo ang mga engineers.
Sa una nga pagbisita sa ila sang Department of Public Works and Highways, ginrekomendar na ang paghatag sang solusyon sa problema.
