Natalana nga mag-atubangay sa Barangay Hall ang Miyerkules ang babayi nga gintampa kag ang nagpanampa nga lalaki sa sa kapehan sa Purok 7, Ylac St, Brgy Villamonte, Bacolod City sang Hulyo 22.
Madumduman nga nag-umpisa ang issue matapos gin-alegar ginpark sang ginareklamo nga ginkilala lamang nga si Freddie Ric Silos ang iya nga salakyan nga Montero Sport sa atubang sang balay sang tagreklamo nga si Anely Espaniola, 43 anyos.
Ginsaway ini sang babayi nga idugon ang salakyan bangod mahimo magasgasan sang kahoy, apang ini ang ginkaakig sang lalaki.
Naghalin ang lalaki agud magpangape sa isa ka coffee shop, apang sa pagbalik, iya ginkomprontar ang biktima bangod sa gina-alegar pagtawag sa iya nga ‘tikalon’, nga ginpanginwala man sang babayi.
Nag-init ang pagbaisay tubtob nga gin-agaw ni Silos ang envelope ni Espaniola kag gintampa sa biiktima sang makaduha ka beses.
Suno kay Espaniola, gintuyo pa ni Silos kuhaon ang botelya apang natumba gani wala sini malab-ot, kag sa baylo, siya ang ginhampak nalang sini sang sinsilyo.
Ang insidente ang nakuhaan man sang biktima sang video, gani gintuyo pa sang lalaki nga agawon ang iya cellphone.
Sa interview sang Bombo Radyo Bacolod kay Police Major Marc Joel Reclamado, station commander sang Bacolod Police Station 4, bangod indi gid man dako ang kaso, ini ang ila na nga ginrefer sa Barangay.
Nakaschedule ang una nga pag-atubangay sang duha sa Hulyo 30, Miyerkules.
Matapos ang tatlo ka session, kag kun wala sang mahuman nga settlement, ang Barangay ang magahatag sang certificate to file action sa babayi.
Ang biktima ang magabalik naman sa ila estasyon, kag ang Bacolod Police Station 4 ang magabulig sa paghikutar sang nagakaigo nga kaso
