Ginahikutar na ang mga proseso sa pagbakal sang duta nga tukuran sang permanent relocation site sang mga Internally Displaced Persons (IDPs) gikan sa sulod sang 4km Permanent Danger Zone sang Bulkan Kanlaon.
Nahibaluan nga may duha ka duta nga ginalantaw gamiton nga ginalakipan sang 8.6 hectares kag 11 hectares nga duta sa banwa sang La Castellana.
Sa interview sang Bombo Radyo Bacolod kay Negros Occidental Provincial Administrator Atty Rayfrando Diaz, gin-aprubahan na sang Sangguniang Panlalawigan ang pagbakal sang 8.6 hectares nga duta sa Barangay Talaptap, La Castellana.
Nagpirma naman si Governor Eugenio Jose “Bong” Lacson sang Deed of Sale sa balor nga P15 million.
Suno kay Diaz, ifollow up nila ang nauna nga proposal sang National Government sa pagrequest sang pondo para sa development sang duta.
Ini bangod sa nauna na nga kasugtanan, ang provincial government ang magapangita sang duta, apang ang national government ang magagasto sa pagpatukod sang mga pasilidad.
Sila ang nagrequest sang P210 million nga pondo para sa proyekto.
Ini bangod luwas sa mga balay sang mga IPDs, sila ang magatukod sang komunidad gani kinahanglan man sang dalan kag pagtakod sang mga kuryente kag tubig.
Ginaplano sang mga ini nga luwas sa balay, hatagan man sang porsyon nga duta ang mga pamilya, agud sila ang may-ara sang matalauma nga magaserbe nila nga palangabuhian.
