Arestado ang isa ka seaman sa drug buybust operation sa Purok Langis, Barangay Banago, Bacolod City alas-8:12 kagab-i.
Ang suspect ang ginkilala nga si John Fredderick Española alyas Bossing, 29 anyos, single father, residente sa nasambitan nga lugar.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, ang subject ang newly identified drug personality kag wala pa sa listahan sang Barangay Anti-Drug Abuse Council (BADAC).
Narecover sa suspect ang pito tanan ka sachet sang suspected shabu nga ginabanta nagabug-at sang 5.2 grams kag may standard drug price nga P28,560.
Samtang gin-ako naman sang subject nga siya ang nagagamit kag nagabaligya bilang pang piyan-piyan lamang sa kada adlaw.
Sa interview sang Bombo Radyo Bacolod kay John Fredderick, siya ang anom ka tuig naman nga nakasakay sa barko lakip ang lima ka tuig sa Domestic.
Suno diri, sang Abril lamang siya nakapanaog sa barko, apang bangod sa problema sa pamilya, siya ang naggamit sang illegal nga droga.
Indi man sini luyag nga magsalig sa ginikanan ilabi na nga siya ang may duha ka ginasagod nga kabataan nga edad lima kag pito ka tuig gikan sa anay kahagugma.
Ini ang rasun nga siya ang na-engganyo sa pagbaligya sang illegal nga droga, nga iya lamang ginarolling.
Suno kay John Fredderick, may ticket na kuntani ini sa pagbalik sa barko apang wala ini nagdayun sa pagsakay bangod indi sini luyag nga maglakat nga may problema sa pamilya.
Aminado man ini sa konsekwensya sa pagsulod sa illegal nga transaksyon, ini lamang ang iya nakita nga paagi agud makapiyan-piyan sa pang-adlaw adlaw.
Suno diri, kalabanan sa iya buyer ang pangayaw.
Samtang ginsuhestyon naman ni Tapang kay Punong Barangay Benjamin Baldo nga mag-issue sang ID sa mga residente, agud nga may monitoring sa mga nagasulod kag gwa sa Barangay.
Suno diri, apisar nga indi gid makasolbar, ini ang makapahagan-hagan sa illegal nga aktibidad.
