Wala sa gihapon sang identity ang bangkay sang lalaki nga nasapwan sa suba sang Hacienda Soledad, Barangay San Vicente, Binalbagan, Negros Occidental sang Agosto 3 sang aga.
Sa interview sang Bombo Radyo Bacolod kay Police Captain Captain Joelan Vinson, hepe sang Binalbagan Municipal Police Station, wala gihapon makilala ang lalaki nga nasapwan nga naga-utaw utaw sa suba sang Hacienda Soledad, Barangay San Vicente sa banwa sang Binalbagan kahapon sang aga.
Suno kay Vinson, ang biktima ang ginabanta naga-edad sang 35 tubtob 40 anyos, may kataason nga 5-foot-2 tubtob 5-foot-5, naga-suksok sang itom nga t-shirt, itom nga short kag may mga tattoo sa lawas.
Nakuha sa iya lawas ang isa ka silver nga relo kag ball ring nga may tatak nga Class 2017, BS Marine Engineering kag Maritime Education.
Ginpahayag sang hepe nga indi residente sang Binalbagan ang biktima bangud nagpatigayon na sila sang imbestigasyon sa mga Barangay nga malapit diri.
Wala man sang pilas nga tuga sang pagpangluthang sa lawas sang biktima.
Wala man ginadula sang mga kapulisan sang Binalbagan ang foul play sa kamatayon sang biktima bangud naputos sang sako ang ulo sini sang nakita.
Mahimo man nga gin-anod ang biktima padulong sa suba sang Binalbagan kun sa diin ini nasapwan.
Ginpalubong na sang Binalbagan LGU ang bangkay subong nga hapon bangud yara na ini sa advanced stage of decomposition.
Nagapanawagan naman ni Vinson sa mga nadulaan sang himata nga makig-angot sa ila talatapan.
