Ginpatuman na sa ciudad sang Bacolod ang resolusyon nga nagadumili sa mga tuman kagahod nga mga tambutso ukon open pipe muffler.
Ini ang City Ordinance 356 ukon ang ordinansa nga nagaregulate sang noise pollution sa Bacolod City.
Sa interview kay Atty. Reuben Sabig, officer-in-charge sang Bacolod Transportation and Traffic Management Department (BTTMD), ini ang ila pagpatuman sang resolution nga ginpagwa ni Bacolod City Councilor Jason Villarosa, chairperson sang Committtee on Tourism sa Sangguniang Panlungsod.
Suno kay Sabig, sang tinalikdan nga mga inadlaw may yara sang mga residente nga nagareklamo sa Barangay Alangilan bangud sa tuman kagahod nga mga mufflers sang mga motorsiklo.
Antes pa man napasar ang resolution nga gin-author ni Villarosa ang BTTMD ang regular nagatsekyar sang open pipes.
Suno sa BTTMD Head, ila ginbasehan sa ila operasyon ang nasambit nga ordinansa nga nagakinahanglan sang sound meter agud nga mahibaluan kun may violation ukon wala ang motorsiklo.
Ginpaathag ni Sabig, 10 meters ang kalayuon sang sound meter sa motorsiklo kag kun maglapaw sa 90 decibels ang katunog, may yara ini sang penalidad.
Sa idalum sang ordinansa, P500 ang penalidad sa first offense, P2,000 sa second offense, kag P3,000 sa third offense kag i-confiscate ang magahod nga muffler.
Suno kay Sabig, sa ila operasyon ila nakita nga may mga motorsiklo nga nagausar sang open muffler pero indi magahod.
