Arestado ang 30 anyos nga babayi nga nagapangawat sang kwarta sa kumpaniya nga iya gina-trabahoan matapos malulong sa paghampang sang online gambling.
Ang babayi ang ginkilala nga si Ericca Mae Rasay, residente sang CT Village, Brgy. Cabug, Bacolod City.
Sa interview sang Bombo Radyo Bacolod kay Police Captain Glen Montaño, station commander sang Bacolod Police Station 10, walo ka tuig na nga nagatrabaho sa isa ka pharmaceutical company si Rasay apang sang tinalikdan nga duha ka tuig may nakita ini nga link sa iya cellphone nga iya natum-ukan kag amo na sang nahibaluan sini ang online gambling nga scatter kag amo na nga nag-umpisa ini sa paghampang.
Suno diri, sa sulod sang duha ka tuig nalulong ini sa paghampang kag kun mapierde nagakuha ini sang kwarta sa kumpaniya kag ginapeke ang mga dokumento agud indi mahibaluan nga may kulang sa kwarta.
Nagdangat sa P800,000 tubtob P900,000 ang kwarta nga nakawat ni Rasay kag siya gindagdagan sang 31 counts sang qualified theft kun sa diin kapin sa P1.7 million ang iya pyansa.
Sa karun nakahunong na si Rasay sa Bacolod Police Station 10.
