Patay ang isa ka lalaki matapos nga mabungguan sang Mitsubishi Canter samtang nagatabok sa National Highway of Sitio Pahilanga, Barangay Miranda, Hinigaran, Negros Occidental.
Sa interview sang Bombo Radyo Bacolod kay Police Lt. Col. Eduardo Corpuz, Chief of Police sang Hinigaran Municipal Police Station, madulom ang lugar kun sa diin natabo ang insidente kun sa hinali lang nga nagtabok ang biktima.
Suno kay Corpuz, mahimo nga wala nakita sang driver nga nagtabok kag nabungguan niya ini.
Ang salakyan ang nagabiyahe halin sa Pontevedra padulong sa Hinigaran.
Ang biktima ang nakaagom sang patal nga pilas sa ulo kag pilas sa nagkalain-lain nga bahin sang lawas kun sa diin gindala ini sa hospital apang gindeklarar nga dead on arrival.
Suno sa hepe ang dalan ang talakron gani para sa iya indi man madasig ang pagpadalagan sa nasambit nga salakyan.
Dugang pa sini nga may yara na sang inisyal nga pag-estoryahanay ang pamilya sang biktima kag ang driver sang canter nga nabunggo diri.
Suno kay Corpuz, kun wala sang makasugtan ang magtimbang nga bahin pasakaan sang kaso ang driver sang salakyan nga nakabunggo sa biktima kag posible nga mangatubang sa kaso nga reckless imprudence resulting to homicide.
Nagpanugyan ang hepe sa tanan nga nagatabok ilabi na sa bahin sang Miranda padulong sa Gargato nga madulom ang lugar nga sila ang makahibalo maghalong kag maglantaw sang dalan antes magtabok agud nga malikawan ang kaangay nga insidente.
