Ginpanawagan sang Punong Barangay sang Barangay Granada sa mga pumuluyo nga ihaboy sang insakto ang basura kasunod sa nagluntad nga baha sang Miyerkules.
Sa interview sang Bombo Radyo Bacolod kay Punong Barangay Armando Vito, sa karun pa lamang naka-eksperyensya sang pagbaha ang lugar ilabi na ang bahin sang Generoso Villanueva Sr. National High School sa Patricia Homes Subdivision kun sa diin kapin sa 80 ka estudyante ang ginrescue matapos magdangat sa hawak ang baha.
Suno diri, may yara sang gamay nga sapa sa area kag sang ila ginstekyar, indi na maka-ilig ang tubig bangod sa basura nga nagsupon sa tamburong.
Sang ginkuha ang mga basura, amo na nga nagsubside ang baha kag madasig ang pag-ilig sang tubig sa sapa.
Pahanumdom ni Vito, likawan ang paghaboy sang basura sa sapa agud indi na maliwat ang amo nga insidente.
Samtang, bulubantayan naman kun liwat nga magbaskog ang ulan kag magbaha sa area suno sa Bacolod City Disaster Risk Reduction and Management Office.
Suno kay Earl Edward Ramirez, operations chief sang Bacolod CDRRMO, nagsupon nga mga basura sa sapa ang rason kun ngaa ginbaha ang Generoso Villanueva Sr. National High School.
Suno diri, nalimpyohan naman ang sapa kag nakuha na ang mga basura kag iya lamang ginapaandam nga maghalong sa pag-ubog sa tubig baha.
