Padayon nga nagapanawagan sang bulig ang alkalde sang banwa sang La Castellana, Negros Occidental sa nagtapan na nga creek sa Brgy Biak na Bato nga makapektohan sa mga pumuluyo sa lugar nga nagapuyo malapit sa sapa.
Sa interview sang Bombo Radyo kay Mayor Añejo Nicor, nagtapan na ang Tamburong creek bangod sa lutak nga nagmala, mga bato kag abo kasunod sa lahar flow nga nagluntad sa paglupok sang bulkan Kanlaon.
Suno diri, sang nag-inulan nakaligad nga nga inadla indi na maka-ilig ang tubig sa creek kag naglapaw na ini sa dalan.
May yara sang 200 ka panimalay nga maapektohan kag ang siyam nga malapit gid sa creek temporaryo anay nga gin-evacuate.
Indi man matandog sang Local Government Unit ang paglimpyo sa creek bangod ginhold sang Department of Environment and Natural Resources ang ila special permit sa paghakot sang nagmala nga lutak, bato kag abo sa rason nga nagabayolar ini sa layi nga gindihon para sa bulkan Kanlaon.
Bangod sini nagbinuligay na lang ang mga pumuluyo sa pagbutang sang mga sako sang balas bilang barikada agud indi makasulod sa ila mga panimalay ang tubig.
Apang sa tion nga mabaskog ang ulan, nagaeksperyensya sa gihapon sang pagbaha ang Brgy Biak na Bato.
