Ginpahayag sang provincial administrator sang Negros Occidental nga wala sang mga flood control projects sa probinsya nga halin mismo sa Department of Public Works and Highways (DPWH) central office.
Suno kay Atty Rayfrando Diaz, wala sang flood control projects nga ginbaton nagikan sa national government kag wala man ang probinsya sang kaugalingon nga proyekto.
Suno kay Diaz, ang probinsya nagplastar lamang sang Disaster Risk Reduction Management Office (DRRM) responder nga makaresponde gilayon sa tion sang pagbaha kag may yara man sang ginbutang nga Barangay Early Alarm system sa flood prone areas kag malapit sa Bulkan Kanlaon.
Ini ang gintutukan sang probinsya nga gingastuhan sang Disaster fund.
Ang kada LGU ang may yara man sang 911 ambulance nga may team nga nakahanda magresponde sa tion sang emerhensya.
May yara man sang backhoe kag excavator ang probinsya nga nagadredge sa mga suba nga silted na agud nga magdalom ang mga waterways kaangay sang suba agud nga kun mag-inulan mapahagan-hagan ang pagluntad sang baha.
