Ginbatikos ni Davao City First District Representative Paolo “Pulong” Duterte ang gin-alegar mando sang isa ka government agency nga paga-imbestigaran ang ila mga propiedad.
Sa iya pahayag sa isa ka facebook post, suno sa iya mga impormante, may isa ka ahensya sang gobyerno nga sa karon nagapangatubang sang mga isyu sa integridad, ang nagmando sa isa ka Investigation Division for Public Corruption nga magpatigayon sang imbestigasyon sa mga property sang mga Duterte.
Wala naman gintumod ni Duterte ang pangalan sang ahensya kag wala man naghatag sang dugang nga detalye tuhoy sa imbestigasyon.
Suno diri, kun may patigayon nga imbestigasyon ukon case build-up batok sa ila, dapat nakabase ini sa ebidensya kag patas nga proseso, hindi sa pulitika.
Ginhangkat man niya ang maga-imbestiga nga pagatutukan ang mga personalidad nga may kaangtanan sa kontrobersiya sa flood control projects.
Dugang pa ni Duterte nga wala sila nahadlok sa anuman nga pagpamahog, harassment, ukon political persecution.
