Patay ang empleyado sang Department of Education (DepEd) matapos nga aksidente sini nga nabungguan ang naka-park nga caro sang Karbaw sa Purok 2, Barangay Magallon Cadre, banwa sang Moises Padilla, Domingo sang kaagahon, Agosto 31.
Ginkilala ang napatay nga biktima nga si Jude Jett Areglo, 42 anyos, kag nagaubra bilang Admin Staff sang DepEd, kag residente sang Purok 1 sa Barangay Guinpanaan, Moises Padilla.
Sa interview sang Bombo Radyo Bacolod kay Police Lt. Arnolfo Robles, Deputy Chief of Police sang Moises Padilla Municipal Police Station, nagabiyahe si Areglo sakay sa Euro 150cc motorcycle gikan sa public plaza kag papauli sa Purok 1, Brgy. Guinpanaan kag sang nagkalab ot sa lugar sang insidente naglapaw ini sa provincial road kag nakabunggo sa salsalon sa bahin sang nakaparking nga caro nga ginapanag-iyahan ni Jerry Nacionales.
Ang biktima ang nakaagom sang pilas sa nawala nga dughan kag natuo nga guya.
Gindala pa ini sa ospital apang gindeklarar nga Dead on Arrival.
