Isa ka Grade 9 student nga naga-edad 16-anyos ang suspek sa pagpangluthang sa Banga National High School, sa diin ini ang nagresulta sa kamatayon sang tatlo ka indibidwal sa South Cotabato.
Natukiban nga ang suspek ang bata sang isa ka empleyado sang Department of Education sa Region 12.
Sa interview kay Banga Mayor Albert “Boyet” Palencia, nagdala ang suspek sang 9mm nga armas-luthang kag duha ka magazine.
Nahibaluan nga ang armas ang ginapanag-iyahan sang iya amay.
Gin-alegar nakuha sang suspek ang armas-luthang naggikan sa sulod sang vault paagi sa pagguba sini.
Suno sa impormasyon nga nakuha ni Palencia sa eskwelahan kag sa mga kapulisan, ang suspek ang gin-alegar nadismaya sa iya nga grado nga tuman ka nubo.
May impormasyon man nga ginakonsiderar sang pamilya nga ipakonsulta ang bata sa mental health professional.
Apang ginakumpirmar pa ang mga nasambit nga impormasyon.
Ginausisa man sang mga otoridad kun ang estudyante ang may kaangtanan sa online “true crime” community, kag kun ang online content sini ang may direkta nga impluwensya sa ginhimo sang estudyante.
Samtang, ginpatuman sang LGU ang suspension of classes sa bug-os nga banwa matapos ang pagpangluthang.
Handa naman maghatag sang psychological first aid kag psychosocial support ang Department of Education (DepEd) para sa mga apektado sang insidente.
Natukiban nga isa man ka manunudlo sa amo nga eskwelahan ang utod sang suspek, samtang ang amay sini ang yara sa General Santos kag nagatudlo sang child safety.
