41 tanan ka volcano-tectonic earthquake ang narekord sa Bulkan Kanlaon humalin alas- 11:00 sang gab-i tubtob alas- 10:00 subong nga aga.
Ang mga linog yara sa range nga magnitude 0.8 tubtob magnitude 4.6.
Ang pinakamabaskog diri amo ang intensity 3 nga nabatyagan sa La Carlota City, Negros Occidental, Bacolod City kag Canlaon City, Negros Oriental kasubong man sa Bago City, Murcia kag La Castellana, Negros Occidental.
Ang volcano-tectonic earthquake nagaluntad kun makusog ang paggiyo sang mga bato sa idalum sa pagsaka sang magma.
Nagdangat naman sa 1,122 tonnes/day ang Volcanic sulfur dioxide (SO2) gas emissions nga narekord kahapon.
Ginapahanumdom sa publiko nga yara sa gihapon sa alert level 2 ang status sang bulkan kag ang pagsaka sang volcano-tectonic earthquake events makatuga sang phreatic eruptions ukon weak to moderately explosive eruptions.
Nagpasiguro ang Department of Science and Technology- Philippine Institute of Volcanology and Seismology nga ginapatigayon ang close monitoring sa bulkan Kanlaon kag kun may bag-o nga mga development ini ang ila ipalab-ot sa publiko.
