Lainlain nga mga sektor ang magahugpong para sa patigayunon nga Trillion Peso March Against Corruption bwas, Setyembre 21 sa Bacolod City Public Plaza.
Sa interview sang Bombo Radyo Bacolod kay Ken Paolo Gilo, National Vice Chairperson sang Akbayan Youth, padayun ang ila pag-imbetar sa nagkalainlain nga sektor sa pag-upod sa ila nga kawsa sa pagpatigayon sang anti-corruption rally.
Suno diri, tuman ka damo sang problema sa Pilipinas nga kinahanglan mahatagan sang prayoridad apang wala matutukan bangod ginkamol sang mga kurap nga opisyal ang dako nga budget sang gobyerno.
Panawagan ni Gilo sa mga luyag na nga ma-untat ang kurapsyon sa gobyerno nga mag-upod bwas sa patigayunon nga demonstrasyon.
Sa inisyal, yara sa lima tubtob anom ka libo ang nagkomiter nga magapasakop kun sa diin sila ang maga-umpisa sang pagmartsa sa Negros Occidental Provincial Capitol Lagoon alas-1:00 sang hapon, padulong sa Bacolod City Public Plaza.
Alas-2:00 sa hapon naman maga-umpisa ang demonstrasyon sa plaza.// Suno kay Gilo, patpaton ang epekto sang kurapsyon sa tagsa ka mga sektor.
Pahanumdom sini nga apisar ang mga pamatan-on kag estudyante ang nagpanguna sa demonstrasyon, tanan nga sektor ang epekto sang kurapsyon.
Suno kay Gilo, siya ang isa man sa magatindog nga speaker, nga magarepresentar sang tingog sang mga pamatan-on.
Dugang pa sini nga ang solidarity rally ang gin-organisar sang civil society organization kag indi partisan event.
Kun sa diin luyag nila nga makita sang gobyerno nga nakita na kag nagakabatyagan sang pumuluyo ang epekto sang malala nga kurapsyon.
Luyag man nila nga seguruhon nga indi kaangay sa iban nga isyu, nga sa pagligad sang inadlaw nagatahaw, sila ang indi maga-untat tubtob nga wala pa sang mapapanabat kag mapriso.
Pahanumdom sini nga madugay na nga nagakatabo ang kurapsyon, kag ini ang dapat na ma-untat, gani ang mga pamatan-on na ang nagpanguna bangod ang resulta sini ang sa ila man magabenepisyo kag sa mga masunod pa nga henerasyon.
