P40-P45 nga minimum wage increase sa Bacolod City kag Negros Occidental, ‘temporary relief’ lamang suno sa labor leader
-- ADVERTISEMENT --

Nagapati ang labor leader nga matabunan lamang sang pagsaka sang bili sang mga balaklon kag serbisyo ang ginsaka nga P40 tubtob P45 sa daily minimum wage sa Western Visayas, kalakip na sa Bacolod City kag Negros Occidental.

Sa interview sang Bombo Radyo Bacolod kay Wennie Sancho, Secretary-General sang General Alliance of Workers Association, makonsiderar lamang nga ‘temporary relief’ ang saka sa sweldo, bangod ini ang indi pa makatakod sa kinahanglan para marestore ang purchasing power sang mamumugon.

Dugangan pa sang nagalala nga economic crisis kag mataas nga cost of living.

Bangod gamay lamang ang saka, nagapati si Sancho nga ini ang matabunan lamang sang inflation ukon sa pagsaka sang presyo sang balaklon.

Nagapati ini nga kadungan sa pagpasaka sa sweldo sang ila mga tawo, ang dugang nga gasto ang ipasalo lamang sang kapitalista sa presyo sang ila nga produkto ukon serbisyo.

-- ADVERTISEMENT --

Pahayag ni Sancho nga ang P45 nominal value, ang may katumbas lamang nga P22.39 nga real value.

Nagapati ini nga agud makabatun ang mga pumuluyo sang sweldo nga medyo labaw sa nagakaigo nga purchasing power, kun ang saka ang yara sa P100 tubtob P150.

Pahayag sini nga wala pagid siya sang nakita nga wage increase nga nakarestore sang purchasing power.

Aminado naman ini nga mahimo makabulig ang pagbatun sang 13th month pay agud makahulag ang ekonomiya ukon makalibot ang kwarta.

Kaladlawan naman para sa iya ang datos gikan sa Philippine Statistics Authority nga nagapahayag nga P96 ang poverty treshold.

Gani ang mga naga-income sang masobra P96 para sa ila ang indi na makonsiderar nga ‘poor.’

Panindugan nila nga P22 lamang ang magasto sa kada kaon, gani sa tatlo ka adlaw nga kaon may mabilin pa sa P96.

Suno diri, unrealistic ang data sang gobyerno.

Dugang pa sini nga wala man sang padaog ang labor sector sa Regional Wage Board bangod duha ang representative sang labor sector, duha sa business sector, kag tatlo ka government official nga sa masami amo ang nagaserbe nga tie breaker.

Suno kay Sancho, permi nga piyerde ang mga empleyado bangod ang mga government offiocials ang nagapabor sa mga negosyante.