Ginkakibot sang anay gobernador sang Negros Occidental ang kadamuon sang mga tawo nga nag-upod sa ginpatigayon nga indignation rally sa Bacolod City Public Plaza kahapon.
Sa interview sang Bombo Radyo Bacolod kay Former Negros Occidental Governor Rafael Coscolluela, founding chair sang Paghimud-os Negros Incorporated, wala sini ginlauman ang numero sang mga pumuluyo nga luyag nga magpabutyag sang ila mga hibubun-ot batok sa korupsyon sa gobyeno.
Una sini nga ginalantaw nga magadangat lamang sa dos mil ang maga-upod, apang sa nakita sini naglapaw sa ginabanta nga numero ang nag-upod.
Suno kay Coscolluela, ang kadamuon sang nag-upod sa indignation rally ang sinyales nga natak-an na ang mga tawo kag indi na pwede nga pabay-an lamang ang gobyerno.
Sang-una panawagan sini nga indi pagpabay-an sang gobyerno ang mga pumuluyo apang sa karun, ang panawagan na sini amo nga dapat indi pagpabay-an sang mga pumuluyo ang gobyerno.
Nagapasalamat ini sa kadamuon sang mga tawo nga naggwa kag nakigbahin sa indignation rally agud magpanawagan batok sa kurapsyon.
Ginpahayag man sini nga dapat magapadayon ang nasambit nga tikang, gani sila ang magasapol pa agud maestoryahan ang masunod nila nga himuon.
Ginalantaw ni Coscolluela nga sila ang makahuman sang bantay-gobyerno ukon government watch.
Isa man sa ginaduso sini nga magbutang sang Independent Commission for Infrastructure (ICI) sa tagsa ka local government units ukon tagsa ka probinsya agud nga masiguro ang transparency bangud indi mahimo nga ang Department of Public Works and Highways (DPWH) ang may ginaubra nga proyekto sa isa ka LGUs nga wala nakahibalo ang local officials.
