13 ka shooting incident sa ciudad sang Bacolod ang nagmatch sa armas-luthang nga nakumpiskar sa suspek nga nadakpan sa ciudad sang Sipalay, Negros Occidental.
Sa interview kay Bacolod City Police Office Director Police Col Joeresty Coronica, sang tinalikdan may nadakpan nga gina-alegar gun for hire sa ciudad sang Sipalay kag sang gintest ang tatlo ka armas-luthang nga nakumpiskar, nagmatch ini sa 13 ka shooting incident nga nagluntad sa ciudad sang Bacolod humalin sang tuig 2021 tubtob 2025.
Padayon sa karun ang imbestigasyon sang BCPO sa status sang mga insidente kun bala may nadakpan na nga suspek, kun may nagpasaka sang kaso kag kun wala man, ano ang rason nga wala sang may nagfile sang kaso.
Pahayag ni Coronica, mangita pa gid sila sang dugang nga ebidensya sa kaangtanan sang suspek sa mga insidente sang pagpangluthang sa ciudad agud mapasakaan ini sang nagakaigo nga kaso.
