Nagpanawagan sang bulig ang pila sa mga evacuees bangod sa pagbaha sa Barangay Pahanocoy, Bacolod City partikular na sang bugas kag habol.
Sa interview sang Bombo Radyo Bacolod kay Rosalita Banay, evacuee gikan sa Purok Hanap Buhay, Barangay Pahanocoy, nagapanawagan ang mga ini nga sila ang mabuligan bangod sila ang wala gid sang may nadala sang magbakwit.
Nagapanguna nila nga kinahanglan amo ang bugas kag magamit sa pagtulog kaangay sang habol.
Suno diri, naanad na sila nga masami nagabaha sa ila lugar, apang kaina sang aga, madasig nga nagsaka ang tubig-baha nga nagdangat sa ila hawak.
Sa pila ka bahin sang Barangay Pahanocoy, nagdangat pa sa tubtob dughan ang baha.
Suno kay Banay, sadto kun magbaha, masami yara lamang sa tikod sang ila tiil.
Nagdesisyon sila nga magparescue ilabi na nga sila ang naga-edad na 40 pasaka kag mabudlayan na kun magsaka pagid ang tubig.
Sa karun, amat-amat naman nga nagasubside ang tubig.
