Nagsaka na sa 60 ang mga reported nga nagkalamatay sa pagtay-og sang magnitude 6.9 nga linog sa Bogo City, Cebu.
Suno kay Office of Civil Defense (OCD) officer-in-charge Assistant Secretary Bernardo Rafaelito Alejandro IV, mahimo pa nga magsaka ang numero bangod padayun pa nga nagasulod ang mga report.
Madumduman nga sa data sang Philippine Institute of Volcanology and Seismology (PHIVOLCS), ang pagtay-og ang natabo alas-9:59 kagab-i.
Una nga nareport nga magnitude 6.7 ang linog, apang ini ang ginpasaka sa 6.9 magnitude.
Ang linog ang may kadalumon nga 5 km kag tectonic in origin.
Ginmanduan naman ni President Ferdinand “Bongbong” Marcos Jr. ang nagkalainlain nga ahensya sang gobyerno nga maghulag kag maghatag sang bulig sa mga apektado nga kumunidad.
Nagpalab-ot man sang pagpakig-unong ang Presidente sa mga nalisdan nga pamilya.
Sa karun, ginpaidalom na sa state of calamity ang probinsya sang Cebu.
Nag-issue naman sang advisory ang Archdiocese of Cebu, nga nagapanawagan sa mga kaparian sa northern Cebu nga indi anay gamiton ang simbahan sa misa tubtob nga wala pa nadeklarar nga safe gamiton.
Nahibaluan nga isa sa naguba sang linog ang Archdiocesan Shrine of Santa Rosa de Lima sa banwa sang Daanbantayan.
Masobra 300 naman ang aftershocks nga narecord sang PHIVOLCS.
