Naghatag sang paathag ang Department of Agrarian Reform – Negros Occidental 1 sa status sang gina-agawan nga duta sa Hacienda Escolastica, Brgy. Mabini, Cadiz City, Negros Occidental.
Madumduman nga nagluntad ang komosyon sa tunga sang mga mangunguma kag blue guards kahapon.
Kun sa diin nagpasalba sang shotgun ang blue guard kag pito ka mga mangunguma ang nasamaran, kag ang isa ang padayun pa nga ginabulong sa ospital.
Sa interview sang Bombo Radyo Bacolod kay Atty Jeremiah Andrada, officer in charge Chief Legal sang DAR – Negros Occidental 1, may-ara sang Collective Certificate of Land Ownership Award (CCLOA) ang 56 tubtob 59 nga Agrarian Reform Beneficiaries, apang sang 2004 nagfile sang retention of property ang tag-iya nga si Ernesto Luzuriaga et al.
Ini ang gindesisyonan, apang sang 2023 nafile man ang mga ARBs sang annulment of judgement.
Ginpaboran ini sang DAR Adjudication Board (DARAB) nga nag-issue na sang finality of judgement pabor sa mga ARBs kasubong man sang writ of execution.
Suno kay Andrada, nagpatigayon na sang conference para kuntani sa installation ukon opisyal nga paghatag sang 66 hectares nga duta upod ang ARBs, militar, kapulisan kag opisyales sang Barangay.
Ginatsekyar man sang DAR kun may standing crops kag threat antes ihatag ang duta.
Nakumpirmar nila nga may blue guards gid man nga yara sa lugar kag may-ara man sang nakatanom nga tubo nga tatlo tubtob apat ka bulan pa lamang.
Santo sa DAR guidelines, indi pa pwede makuha ang duta tubtob nga may nakatanom, kag hulaton nga maharvest nga sa ila assessment mahimo sa Pebrero 2026.
Apang luwas diri, hinali nga may nagpagwa sang lain pagid nga land title ang tag-iya sang duta.
Suno kay Andrada, temporaryo nga ginbawi ang finality of judgement kag writ of execution, samtang wala pa nadesisyonan ang issue tuhoy sa nagadoble nga land title.
Panawagan sini sa mga ARBs nga mangin kalmado lamang kag magsalig sa proseso kag layi.
Suno diri, indi dapat magpadala sa kaakig bangod wala sang pulos ang duta kun wala naman sang kabuhi ang magapanag-iya.
