Dakop ang 34 anyos nga lalaki nga nagpakuno-kuno nga Philippine Drug Enforcement Agency (PDEA) agent matapos makuhaan sang 17 ka gramos sang suspected shabu sa Barangay Zone V, Murcia, Negros Occidental.
Ang suspek ang ginkilala nga si alias “Dimpoy”, wala sang trabaho, kag residente sang Barangay Zone IV, Murcia.
Sa interview sang Bombo Radyo kay Agent Jan Keith Capili, acting PIO sang PDEA- Negros Island Region, nareport sa “Isumbong mo sa PDEA” si alias “Dimpoy” kag matapos ang validation, positibo nga involve sa illegal activities ang suspek.
Siya nadakpan sa ginpatigayon nga buy-bust operation sang Philippine Drug Enforcement Agency Regional Office NIR – Regional Special Enforcement Team kaupod ang PDEA Regional Office NIR-Negros Occidental Provincial Office, Special Operations Unit of the Negros Island Region PNP Drug Enforcement Group, kag Murcia Municipal Police Station.
Suno diri si alias “Dimpoy” nagapakuno-kuno nga PDEA agent bilang cover up sa involvement sini sa illegal drug activities.
Nakumpiskar kay alias “Dimpoy” ang 13 ka sachet sang suspected shabu nga nagabug-at sang 17 ka gramos, buy-bust money, kag coin purse.
Siya pasakaan sang kaso sa pagbayolar sang Section 5 kag 11 sang Republic Act 9165 ukon Comprehensive Dangerous Drugs Act of 2002.
