Ginsaysay sang Negrense nga Regional Director sa Bureau of Fire Protection Region 7 ang makahalanusbo nga sitwasyon nga ila na-atubang sa 6.9 magnitude nga linog sa Cebu.
Sa interview sang Bombo Radyo Bacolod kay BFP Region 6 Director Fire Chief Superintendent Fred Trajeras, ginakasubo sini ang kamatayon sang 70 ka mga persona kalakip na ang isa ka fire personnel sa banwa sang San Remegio.
Suno diri, may ginapatigayon nga may basketball tournament nga ginapatigayon sa banwa sang San Renegio kun sa diin naga-atubangay ang BFP kag Philippine Coast Guard.
Natabuan nga nagalay-up pa ang napatay nga bombero sang natabo ang linog.
Suno kay Trajeras, kalakip sa training kag instict na sa ila nga gilayon nga mag-evacuate kun may linog.
Gani apisar nga madamo sang mga tumalan-aw, ang bombero kag tatlo ka PCG personnel ang parehas nga naghingagaw nga makagwa sa covered court, apang sila ang narusdakan sang mga beams ukon debris gikan sa pasilidad.
Lunsay ginbawian sang kabuhi ang bombero kag duha ka PCG personnel, samtang pila sa mga nabilin sa sulod ang nag-angkon lamang sang light injuries bangod sa entrance lamang sang covered court ang narumpag.
Ara kaina sang aga sa close out ceremony ang 27 anyos nga asawa sang biktima.
Ginpasalig man ni Trajeras nga suportahan ang nalisdan nga pamilya kasubong man sabton ang pag-eskwela sang isa ka tuig palang sini nga bata.
Samtang ang BFP man ang nakarecover sang ulihi nga bangkay sang mag-iloy gikan sa narumpag nga pension house sa Bogo City, Cebu.// Gani nagsaka na sang 70 ang mga narecord nga napatay.
Suno kay Trajeras, masakit dumdumon ang natabo sa mag-iloy.
Nahibaluan nga nagatrabaho sa pension house ang 45 anyos nga iloy.
Apang may gintambungan ini nga bible study sa pension house dala ang iya 4 ka tuig nga bata, gani nagdesisyon sila nga didto na lamang magtulog.
Sang marecover ang bangkay, makita nga ginahap-an sang iloy ang lawas sang iya bata, nga nagapakita nga ginsalo sini ang mga debris agud maprotektahan ang iya bata.
