Padayun ang pagpangita sang kapulisan sa driver sang motorsiklo nga naghit-and-run sa motorsiklo kag nakapatay sa 50 anyos nga mekaniko sa circumferential road, sa atubang sang Villa Socorro 2 Subdivision sa Brgy Taculing, Bacolod City alas-12:05.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, ang duha ka motorsiklo ang lunsay nagabyahe gikan sa norte padulong sa sur.
Nauna ang biktima nga si Arden Paloma, 50 anyos sakay sa iya Yamaha Mio nga motorsiklo nga papauli na kuntani gikan sa trabaho samtang nagasunod naman sa iya ang Honda Airblade sang wala makilal-an nga persona.
Sa pagpangusisa, natumod nga madasig ang dalagan sang Honda kag nabungguan sini ang buli sang motorsiklo ni Paloma.
Bangod sini natumba ang duha ka motorsiklo, kun sa diin nalipungan si Paloma samtang gilayon man nga nagbangon ang driver sang Honda kag nagpalagyo.
Suno sa nakawitness 2960NM ang plate number sang Honda, apang ini ang wala sa system sang Land Transportation Office, gani ginalantaw nga mahimo may nagsala lamang nga number ukon letter.
Ginhingagaw pa dala sa Corazon Locsin Montelibano Memorial Regional Hospital si Paloma agud mabulong, apang ini ang ginbawian sang kabuhi.
Nagapati ang kapulisan nga may injuries ang suspect gani ginatsekyar man nila ang record sang mga nagpadulong sa ospital sa amo nga mga inoras.
Padayun man ang pagtsekyar sa mga CCTV footages nga mahimo makabulig sa pagtumod sa identity sang driver.
