Patay ang 28-anyos nga lalaki matapos magbunggo ang ginamaneho sini nga motorsiklo sa isa ka pribado nga salakyan sa Intersection Burgos-Lacson Streets Road, Brgy. 19, Bacolod City sang Oktubre 12, alas 3:05 sang kaagahon.
Sa impormasyon nga nakuha sang Bombo Radyo, nagabyahe si Zhiyong, 45-anyos, isa ka Chinese national kag residente sang Villa Angela, Barangay Villamonte, Bacolod City sakay sa iya Ford Territory sang aksidente ini nga nabungguan sang Yamaha Mio nga motorsiklo nga ginamaneho ni Scotch Parket Garllarse, 28-anyos, Filipino, residente sang Barangay Poblacion 1, Sagay City.
Si Garllarse ang nagabyahe nagikan sa sur padulong sa norte nga direksyon sang Dalan Lacson.
Nakaangkon sang patal nga pilas ang motorcycle rider kag gilayon nga gindala sa Corazon Locsin Montelibano Memorial Hospital para sa pagbulong apang ginbawian ini sang kabuhi.
Sa karun yara si Zhiyong sa kustodiya sang Bacolod Police Station 1 kasubong man ang ila mga vehicles para dugang nga imbestigasyon kag nagakaigo nga disposition.
