Naglupok ang isa sa tatlo ka granada nga ginhaboy sa isa ka balay sa Prk Villa, Brgy Tangub, Bacolod City, pasado alas-12:00 kaina sang kaagahon.
Sa interview sang Bombo Radyo kay Edmundo Diaz, tiyo sang tag-iya sang balay, nagakatulog ang iya hinablos kaupod ang iya asawa kag duha ka bata kag isa sini ka pakaisa sang may naghaboy sang granada sa ila balay.
Suno diri, may isa ka granada nga una ginhaboy sa sulod sang balay kag nalagyo ang mga suspetsado apang matapos ang pila ka minutos, liwat sila nga nagbalik kag naghaboy liwat sang granada.
Suno kay Diaz, tatlo ka beses ini nga ginhimo sang mga suspek kag isa sa tatlo ka ginhaboy nga granada ang naglupok.
Pahayag sini, maboot nga tawo ang iya hinablos nga sadto pigado lamang apang nagtinguha tubtob nga nakapundar sang negosyo nga pagparenta sang salayan.
Ginalantaw sini nga rason sa pagpanghaboy sang granada amo ang pagkadalahig sang iya hinablos sa kaso sang pagpangscam sang tinalikdan nga tuig sang ginrentahan sng mga scammers ang iya salakyan para gamiton mag-scam sa iban nga tawo.
Suno pa diri, may yara man sang iban nga mga nagarenta nga wala nagabayad sa iya.
Wala naman sang may napilasan sa natabo nga insidente kag padayon pa ang imbestigasyon.
