Napasakaan na sang kaso nga murder kag frustrated murder ang isa sa duha ka suspect nga nagluthang sa mag-utod nga Espina sa Purok Active, Brgy Mandalagan, Bacolod City sang Setyembre 29.
Madumduman nga angkasanay sa motorsiklo ang mag-utod nga Harold kag Harly Espina sang sila ginluthang sang riding-in-tandem suspects nga nagasakay sa bajaj.
Dead on the spot si Harold samtang may-igo man sang bala si Harly nga nahimo nga matabangan sa ospital.
Nakilal-an ang gunman nga suspect nga amo si Alyas Ungi.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, ang complainant sa kaso nga murder amo ang bata sang isa ka biktima samtang si Harly mismo ang complainant naman sa kaso nga frustrated murder.
Suno diri, temporaryo nga ginpagwa sa ospital si Harly apang naka-schedule sa pagbalik para sa operasyon agud makwa na ang bala sa iya nga likod.
Pahayag ni Tapang, padayon ang ila mandato sa pagprebentar sa mga krimen apang kun indi gid man masarangan, nagapangita sila sang pamaagi agud makilal-an ang mga suspek kag mapasakaan sang kaso.
