May-ara sang nadiskubrehan nga pag-usmod kag malaba nga litik sa duta malapit sa highway sa Barangay Mambaruto, Sipalay City.
Sa interview sang Bombo Radyo Bacolod kay Sipalay City Disaster Risk Reduction and Management Office Head Dionelo Bogtae, indi pa nila matumod kun ang litik sa duta ang tuga sang linog ukon bangod sa lain nga rasun.
Ang crack ang nakit-an sang mga nagatrabaho sa Department of Public Works and Highways nga may gintinluan nga kalog sang aga, apang sa ila pagbalik sang hapon nadula na ang kalog.
Ang crack ang malapit gid lamang sa kilid sang dalan nga ginalabayan padulong sa banwa sang Hinobaan.
Sa ila nga pagtakos, tatlo ka metros ang kadalumon sang crack samtang ang distansya naman sang duta ang nagdangat sa 80 cm.
Ang pihak nga bahin sang duta ang nag-usmod naman sang tatlo ka tapak gikan sa orihinal sini nga ground level.
Ginahulat pa nila nga matsekyar sang Mines and Geosciences Bureau ang area agud mahibal-an ang rasun sang pagcrack kag pag-usmod sang duta.
Wala naman sang malapit nga pamalay sa lugar, magluwas sa yara sa idalom sang creek sa pihak nga bahin sang dalan.
Ang mga pamalay sa idalom ang gintsekar naman sang City Social Welfare and Development sang Sipalay City.
Isa sa ginakahangaw-an ang pag-ulan, kun sa diin mahimo masudlan sang tubig ang crack kag maghumok nagid ang duta, nga mahimo makatuga sang landslide padulong sa dalan.
Nagbutang naman sila sang warning nga landslide prone area ang dalan.
