Nagpasalig ang Department of Public Works and Highways nga wala sang dokumento may kaangtanan sa flood control projects sa Bureau of Research and Standards (BRS) building sa Quezon City nga nasunog sang Miyerkules sang hapon.
Ang BRS amu ang responsable sa pagpatigayon sang research, studies, pilot testing kag formulation sang mga polisa para sa infrastructure projects sang gobyerno.
Suno sa DPWH, nagapakita ang initial findings nga nagsugod ang kalayo sa isa ka computer unit sa sulod sang Materials Testing Division nga ginaalegar naglupok.
Wala man sang empleyado nga nasamaran sa insidente.
Gindeploy na ang investigation team agud i-assess ang sunog kag nagapatigayon sa karun sang madalom nga assessment agud madeterminar ang kadakuon sang halit.
Samtang, ginpahayag naman ni DPWH Assistant Secretary Melody Villar nga kalabanan sa mga records nga naapektuhan sang sunog ang safe nga nakatago sa central database sang ahensya kag gin-emphasize nga ang digitalization efforts sini ang nagbulig sa pagpreserbar sang critical data.
