Nagpagwa sang statement ang legal team ni Raymart Santiago angot sa mga pahayag ni Inday Barretto- iloy ni Claudine nga anay asawa sang aktor.
Suno sa law firm, wala sang kamatooran ang mga pahayag ni Inday sa kasal sini sang ila kliyente kay Claudine.
Madumduman nga ginpahayag ni Inday nga ginasakit kag gina-abuso ni Raymart si Claudine sang naga-upod pa ang mag-asawa.
Suno diri, nakabaton ini sang tawag halin kay Claudine nga nagapangayo sang bulig.
Ginklaro man sini nga indi drug addict ang iya bata apang may yara ini sang mental health condition.
Suno sa kampo ni Raymart, nag-umpisa ang kaakig ni Inday sa conjugal land sang mag-asawa nga gina-alegar ginbaligya ni Claudine tatlo ka tuig na ang nakaligad nga wala sang pagpahibalo sa aktor.
Ginpadumdum man sang mga abogado ni Raymart sa mga Barretto ang Gag Order nga ginpagwa sang Family Court, Branch 5 sang Mandaluyong City sang 2023 nga athag nga ginasunod sang ila kliyente.
Santo pa sa statement, nagalaum sila nga sundon man ini Claudine kag sang iya pamilya bilang respeto sa courts of justice kag ilabi na sa ila mga kabataan.
Wala pa sa karun napagwa sang pahayag si Claudine angot sa mga ginhambal sang iya iloy.
Tuig 2006 sang ginkasal sanday Claudine kag Raymart kag nagbulagay sang 2013.
Sila may yara sang duha ka bata.
