Tatlo ka kaso ang pangatubangon sang drug personality nga natiruhan matapos gintuyo nga agawon ang service firearm sang pulis sa Purok Langis, Brgy Banago, Bacolod City kahapon sang aga.
Madumduman nga magapatigayon kuntani ang mga operatiba sang Bacolod Police Station 3 sang pagserbe sang warrant of arrest sa isa ka wanted person nga natumod nga yara sa lugar.
Apang naaktuhan nila nga nagapatigayon sang illegal drug transaction ang indi magnubo walo ka indibidwal.
Kun sa diin hinali nga ginhaboy sang suspect nga si Alyas Joe, 49 anyos ang duha ka sachet sang suspected shabu nga iya ginakaptan sa pihak nga kudal upod sa P2,050 nga cash proceed sang makita sini ang kapulisan.
Apang namutikan sang pulis nga may sukbit nga cal. 38 revolver si Alyas Joe gani ini ang gintutukan sang pulis sang iya service firearm agud madis-armahan ang suspect.
Apang nagbato ini kag sila ang nagpukutay tubtob nga natiruhan ang suspect sa iya nawala nga guya.
Sa karun, estable na ang kondisyon sini samtang ginabulong sa ospital, samtang nag-angkon naman sang mga bagras sa lawas ang pulis.
Luwas kag Alyas Joe, naaresto man sanday Alyas Adrian, minor kag Alyas Joshua, 34 anyos; samtang ang iban ang nakapalagyo.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, si Alyas Joe ang pasakaan nila sang tatlo ka kaso nga ginalakipan sang Republic Act 9165 ukon Comprehensive Dangerous Drugs Act of 2002, Republic Act 10591 ukon Comprehensive Firearms and Ammunition Regulations Act kag Disobedience to person in authority bangod sa pagtuyo sini nga maagaw ang armas sang pulis.
Samtang ang duha ka iban pa ang may paglapas naman sa RA 9165.
