Ginpaseguro sang alkalde sa banwa sang Moises Padilla nga wala na sang gastuhan ang pamilya sang anom ka tuig nga bata nga napatay matapos masalabat sang bala sa engkwentro sa tunga sang militar kag New People’s Army (NPA).
Madumduman nga nagluntad ang engkwentro kahapon sang aga sa tunga sang 62nd Infantry Battalion kag remnants sang Central Negros 1 gikan sa Sitio Matil-e, Guihulngan City, Negros Oriental tubtob nga nagdangat ang lagsanay sa Sitio Inangaw, Barangay Quintin Remo, Moises Padilla.
Sa interview sang Bombo Radyo Bacolod kay Moises Padilla Mayor Ella Celestina Yulo, yara sa ubos-ubos lamang sang encounter site ang balay sang biktima.
Na-estorya naman sini ang mga ginikanan, kag ginpahayag sang mga ini nga sila ang nagapanago kag nagapanilag sa nagakatabo nga bayluhanay sang lupok tubtob nga naglusot ang bala sa ila balay kag nag-igo sa bata..
Suno kay Yulo ang Moises Padilla Municipal Government ang nagpalab-ot na sang financial assistance sa pamilya.
Ginpasulod naman nila ini sa programa sang banwa para sa mga indigents nga libre nga balsamar kag lungon.
Ang nalisdan nga pamilya ang ginpaidalom naman sa psychological debriefing sang Municipal Social Welfare and Development Office.
Nagpalab-ot man sang bulig ang iya bana nga Bise Alkalde kasubong man si Negros Occidetal 5th District Representative Atty Dino Yulo, ang Office of the Vice President (OVP) kag iban pa nga organisasyon kag indibidwal.
Ginakasubo sini nga bangod sa engkwentro isa ka inosente nga kabuhi ang nadula.
