Ginahulat pa ang resulta halin sa Scene of Crime Operations (SOCO) sa nasapwan nga dugo sa sulod sang gin-abandonar nga salakyan sa sulod sang kampo sa Sitio So-ol, Brgy. Gargato sa banwa sang Hinigaran.
Ang tag-iya sang salakyan ang nakilala nga si Kristine Joy Dignadice, 43 anyos, kag residente sang Victorias City.
Nahibaluan nga gireport sang isa ka concerned citizen sa Hinigaran Municipal Police Station ang nakita nga grey nga Hyundai Accent nga yara sa sulod sang kampo alas-3:58 sang Miyerkules sag hapon.
Sa interview sang Bombo Radyo kay Negros Occidental Police Provincial Office Provincial Director Police Col. Dennis Wenceslao, nakakuha na sang sample sang dugo ang SOCO kag ginhulat na lang ang DNA result.
Suno diri wala sang may nakita nga threat sa lugar kag ang salakyan ginbilin lamang didto.
Tubtob sa karun, indi sa gihapon macontact ukon unattended ang cellphone number ni Dignadice.
