Nagpasalig ang Negros Electric and Power Corporation (NEPC) nga 100 percent na nga ma-energized ang kuryente sa Lunes ukon sa Martes.
Suno kay Engr Bernard Bailey Del Castillo, chief operation officer sang NEPC, sa ila assessment, 210 tanan ka poste ang nagkalatumba kag ini ang ila isa-isa nga ginatrabaho.
Suno diri, sang Biyernes yara na sila sa 65 percent energization sa bug-os nga sakop sang franchise area sang NEPC, kag kagab-i nakalab-ot na sila sang 73 percent.
Sa bahin sang ciudad sang Bacolod, 100 percent na nga energized ang tanan nga feeders kag substations nga dapat gid unahon antes makaconnect diri ang linya nga amo makahatag sang kuryente sa tagsa ka panimalay.
Pahayag sini kun wala sang pag-ulan nga matabo, mahimo nga subong nga adlaw malab-ot na nila ang 90 percent energization.
Sa karun wala untat ang trabaho sang NEPC, sa bulig man sang duha ka construction team halin sa Bohol, tatlo sa Iloilo kag subong nga adlaw maabot ang tatlo ka team nga may dala nga heavy equipments gikan sa Cagayan.
Samtang, yara na sa 88 Million Liters per Day ang naprovide nga tubig sang PrimeWater sa ciudad sang Bacolod matapos ang bagyo Tino.
Suno kay Engr Allan Genovata, technical head sang PrimeWater, gikan sa 100 MLD nga ginaprovide nila kada adlaw sa ciudad, 88 MLD na ang ila mahatag sa karun kag kahapon nagdangat sa 210,000 liters ang ila nadeliver sa ciudad.
Suno diri, iban sa mga isolated areas kaangay sang Brgy Vista Alegre, Taculing, Cabug, Mansilingan kag Tangub ang wala sa gihapon sang supply sang tubig kag ini ila ginatinguhaan nga madul-ongan sang tubig.
Pahayag ni Genovata, bisan sila mismo sa PrimeWater nagub-an sang pumping stations nga ila na sa karun ginatinguhaan nga mapadasig nga makay-o agud 100 percent na nga mahatag ang supply sang tubig sa ciudad.
