Duha ka bangkay ang magkasunod nga nasapwan kahapon sa nagapadayun nga search and retrieval operation sa banwa sang Binalbagan.
Nagapanimaho na sang nasapwan ang bangkay sang isa ka retired army sa Sitio Loblob, Barangay Palayog sa banwa sang Hinigaran kahapon sang aga, Nobyembre 10.
Sa interview sang Bombo Radyo Bacolod kay Lt Junior Grade James Carbajosa, commander sang Coast Guard Station Southern Negros Occidental, nasapwan ang bangkay sang retired army kahapon sang aga kasunod sa nagapadayon nga search and retrieval operations nga ginapatigayon sang katapo sang Philippine Coast Guard kag Hinigaran Municipal Disaster Risk Reduction Management Office.
Ginkilala ang nasapwan nga bangkay kay Andre Vasquez, 52 anyos, residente man sang nasambit nga lugar.
Ang biktima ang gin-anod sang mabaskog nga current sang tubig-baha bangud sa pag-ulan dala sang Bagyo Tino.
Mismo ang bata sang biktima ang nagtumod nga amay sini ang nasapwan.
Ginbutangan lamang sang mga otoridad sang apog ang nasapwan nga bangkay antes ginsulod sa body bag bangud ini ang nagapanimaho na.
Isa pa ka bangkay ang nasapwan sa banwa sang Hinigaran sa nagapadayon nga search and retrieval operations sang mga missing persons sa Southern Negros Occidental bangud sa paglaslas sang Bagyo Tino.
Sa post ni Negros Occidental 5th District Representative Atty. Dino Yulo narecover ang bangkay sang babayi nga nagabusong malapit sa taytay Bagacay, Barangay Aranda, Hinigaran.
Ini ang maniwang, malaba ang buhok kag nagasuksok sang shorts.
Sa interview sang Bombo Radyo Bacolod sa radio operator sang Hinigaran Municipal Disaster Risk Reduction Management Office, ang bangkay ang gindal-an nalang sang cadaver bag, ginsulod sa lungon kag iderecho na nga ginlubong.
Ang bangkay ang nasapwan 14 kilometros halin sa town proper.
Ini ang una nga nakita sang naglabay nga magapaligo sa suba nga nagdumdom nga patay nga baboy ang nagapanimaho apang sang gintsekyar ini ang natumod nga bangkay sang tawo.
Suno sa radio operator, ang bangkay ang indi residente sang Hinigaran bangud isa nalang ang missing sa banwa nga nasapwan na kahapon.
Ginalantaw sang mga Hinigaran DRRMO personnel nga ini ang residente sang Magallon ukon sang Moises Padilla bangud suno kay Congressman Yulo, 17 pa ang ginapangita nga missing sa banwa kag mahimo gin-anod sang tubig sa suba padulong sa Hinigaran.
May walo na nga narecover sa Hinigaran kag isa diri ang residente sang Sagay City, nga nagaubra sa ginapatindog nga pigery sa banwa.
