Nakilal-an na ang suspek nga nagpatay sa negosyante nga lalaki sa Purok Masinulondon, Barangay 23, Bacolod City, sang Nobyembre 8, 2025.
Ang biktima ang ginkilala nga si Mick Jagger Taasan, 54 anyos kag residente sang Easthomes, Brgy Estefania, ciudad sang Bacolod.
Sa interview sang Bombo Radyo Bacolod kay Police Major Marc Joel Reclamado, station commander sang Bacolod Police Station 4, may yara sang naka-witness sa natabo nga shooting incident amo nga nakilal-an kun sin-o ang suspek sa pagluthang-patay sa manager sang car rental.
Suno diri, ang suspek amo ang partner ni Taasan sa negosyo kun sa diin ginalantaw nga motibo diri amo nga may yara sang utang si Taasan sa suspek.
Nakit-an nga nagbaisay ang duha tubtob nga ginluthang sang suspek ang biktima.
Ginahitso na sa karun ang pagpasaka sang kaso nga murder batok sa suspetsado.
