Nagabaha sang reklamo angot sa serbisyo sang garbage collector sa Bacolod City nga IPM Construction and Development Corporation.
Sa interview sang Bombo Radyo Bacolod kay Bacolod City Councilor Homer Bais, chairperson sang Committee on Environment and Ecology sa Sangguniang Panlungsod, gintawag sini nga “nabagyuhan” ang performance sang IPM.
Suno sa konsehal, sa paglaslas sang bagyo TINO, malauman na nga nagdoble kag triple man ang mga halakuton nga sagbot ilabi na nga madamo sang mga kahoy ang nagkalatumba kag nagakapuspos ang dahon sa duta.
Aminado man ini nga nagalibot ang garbage trucks sang IPM apang ini ang pila lamang ka bilog.
Suno kay Bais, sa 30 ka compactors plus dumptrucks sang IPM, madamo diri ang guba kag makita lamang sa ila motorpool nga nakastandby.
Pahayag sini nga nakabutang sa kontrata nga sa tion sang kalamidad, ang IPM ang magdeploy sang mga salakyan nga magahakot sang mga basura, gani kuntani ang mga ini ang nagrenta sang temporary nga augmentation bilang kabahin sang ila contractual obligation.
Dugang pa ni Bais nga manugtapos na ang kontrata sang IPM sa Disyembre apang wala pagid nila maturn-over ang 20 ka 3-wheeled vehicle ukon racal nga yara man sa kontrata.
Suno sa konsehal, ang mga violations ukon non-compliance ang sarang malakip sa liquidated damages.
