Nagtuga sang tuman nga pagbaha sa madamo nga komunidad sa Taiwan ang Bagyo Fung Wong nga una na nga naglaslas sa Pilipinas bilang Super Typhoon Uwan.
Antes pa ang pag-igo sang bagyo sa Taiwan, linibo nga mga persona ang gin-evacuate sang gobyerno samtang ginsiraduhan ang mga eskwelahan kag business establishments.
Nagdangat naman sa 51 ka mga persona ang natumod nga nag-agom sang nagkalain-lain nga pilas bangud sa epekto sang bagyo.
Sa Yilan County, pila ka mga lugar ang naka-eksperyensya sang tubtob 650mm sang ulan nga nagtuga sang lapaw sa tawo nga pagbaha.
Ini ang equivalent sa isa ka bulan nga volume sang ulan, nga nagpalubog sa masobra 1,000 ka mga pamalay.
Sa karun, nagapabilin sa evacuation center ang masobra 8,300 ka mga persona nga gin-evacuate matapos ginbaha ang ila mga pamalay.
