Ginpanginwala sang mga anay kag incumbent nga mga senador ang mga akusasyon nga sila ang imbolbado sa korapsyon sa flood control projects, matapos nga ginpangalanan ni former Department of Public Works and Highways (DPWH) Undersecretary Roberto Bernardo sa hearing sang Senate Blue Ribbon Committee.
Nalakip sa mga ginpanglawag ni Bernardo amu sanday former Senator Grace Poe, Nancy Binay, kag Sonny Angara, nga ginaalegar nagbaton sang kickback nagikan sa mga proyekto.
Ginpanginwala ni Angara ang alegasyon kag ginpahayag nga wala ini sang kaangtanan sa anomaliya.
Dismayado naman si Poe nga nalakip ang iya pangalan kag nagapati nga dapat ibasura sang Department of Justice ang nasambit nga akusasyon.
Samtang, ginpanginwala man ni Binay ang anuman nga kaangtanan sini sa flood control projects kag ginhighlight nga wala ini sang papel ukon partisipasyon sa nasambit nga mga proyekto.
Magluwas sa mga ini, nalakip man ang pangalan ni Senator Mark Villar nga ginpanginwala man ang nasambit nga akusasyon.
Kahapon, ginbuyagyag ni Bernardo nga si former Senate President Francis “Chiz” Escudero ang makapila ka beses nga nakabatun sang kickbacks gikan sa flood control project.
Ang commitment kay Escudero ang nagdangat sa 20 porsyento sa mga proyekto nga ginpatuman sa Valenzuela, Marinduque, Oriental Mindoro, kag Quezon City halin 2024 tubtob 2025.
Samtang sang 2023, si Senator Jinggoy Estrada ang nagrequest naman kay anay DPWH Secretary Manny Bonoan paagi sa iya sang proyekto nga balor P500 million para sa DPWH-NCR building nga ginlakip ni Undersecretary Cathy Cabral sa National Expenditure Program para sa 2024.
Ang Senador ang nakabatun sang commitment nga 18 porsyento.
Samtang personal man nga nakadeliver si Bernardo sang P125 million nga kickbacks kay former Senator Bong Revilla sang 2024.
Suno diri, ang kwarta ang gingamit ni Revilla sa iya Senatorial campaign sang 2025 midterm elections.
