Ang Punong Barangay nalang sang Barangay Granada, Bacolod City ang magakuha sang cutter kag magapang-utod sang mga nagaluyloy nga linya sang telecommunication companies kun indi pagid mahimos.
Sa interview sang Bombo Radyo Bacolod kay Punong Barangay Armando Vito, tuman nagid ang iya nga pag-ugtas bangod makapila na ini nga nagpanawag sa telcos apang siya ang ginapasa-pasa lamang.
Suno diri, nasab-itan ang linya sang isa ka salakyan gani naghilay ang poste kag nagluy-loy ang mga kable sa national highway pasulod sa Charito Heights Subdivision, ukon sa alagyan padulong sa Brgy Alangilan.
Nagaka-alarma ang Punong Barangay bangod delikado sa mga motorista ang dalanon ilabi na kun gab-i.
Dugang pa ni Vito nga antes paman ang pagluyloy sang telecom wires, ang dalan ang kilala na nga accident prone area.
Liwat ini nga magadangop sa PLDT Smart subong nga adlaw kag nagalaom nga himuson na nila ang kable nga masobra duha ka semana na nga nagahatag peligro sa mga motorista.
Suno diri, sang una nga nagreport, ang nangin tikang lamang sang telco amo ang pagtukod sang poste apang wala na ginbalikan.
Dugang pa sini nga mahimo kun may makasalapay sa linya, madalahig pa ang linya sang Negros Power kag liwat makatuga sang brownout.
Suno diri, siya ang magapropose sang ordinansa nga indi magpirma sang certification ang Barangay para sa mga telcos kun sila ang may mga adisyonal nga proyekto tubtob indi nila mahimo ang ila nga mga spaghetti wires.
