Ginpakigbahin sang presidente sang K9 search and rescue of the Philippines Inc. ang nahatag nga bulig sang ido sini nga si Gabay sa search and rescue operations.
Sa interview sang Bombo Radyo kay Junelo Castillo, madugay na ini nga mahilig sa mga ido tubtob nga nagdesisyon ini nga mag-train sang ido agud magamit sa Search, Rescue and Retrieval Operations ilabi na nga limitado lamang ang mga K9 nga ginagamit sa kaangay nga operations.
Suno diri, matapos ang paglaslas sang bagyo Tino nagpangayo sang bulig sa ila ang banwa sang Isabela sa pagpangita sang mga missing persons kag sa pila ka adlaw nila nga paglibot-libot sa mga affected nga lugar, may nakita si Gabay nga buhi nga Karbaw nga madugay na nga ginapangita sang tag-iya.
Ang karbaw ang naglambod sa higot kag tuman na kagutom matapos nga ma-missing sa sulod sang 14 ka adlaw.
Pahayag ni Castillo, antes sini ginatrain ang ido, ginalantaw sini anay ang kapabilidad sang ido kag amo na nga gina-ensayo.
Si Gabay gin-ensayo sini sa pagpangita sa mga bangkay sang tawo sa duta ukon sa tubig ukon bisan may mudflow.
Wala naman sini ginahigtan si Gabay kun may trabaho sila nga duha indi kaangay sa iban nga K9 nga ido nga ginagamit sa search operations.
Dugang pa ni Castillo, bilang handler dapat mamonitor ang batasan sang ido kag dapat aware man ang handler sa nagakabatyagan sang ido.
